Electrões fugidios

Reflexões ao fio do projecto Sermos Galiza - III

2011-07-14T19:10:00.001+02:00

Alternativa

Pode-se nesta situaçom artelhar um jornal em galego, independente e crítico?. Na minha opiniom nom é viável enquanto empresa comercial. De facto vejo mesmo difícil um jornal comercial em castelhano crítico e independente dos poderes políticos e económicos, a pesar do maior público potencial. Porém, penso que é possível artelhar um jornal comunitário de qualidade, que combine o trabalho de profissionais com trabalho voluntário.

Usando as capacidades de colaboraçom que permite a internet, tenhem-se desenvolto um bom número de trabalhos comunitários, com resultados magníficos, pensemos nos inúmeros projectos de software livre, na wikipedia, na wikileaks, etc. A maior parte dos projectos deste tipo que me venhem a cabeça combinam um pequeno grupo de profissionais pagados, com um grande grupo de voluntários que colaboram sem remuneraçom económica. Acho que o galeguismo pode manter um projecto deste tipo, e mais depois que a crise económica tenha posto a nú o falhanço do sistema neoliberal que a imprensa comercial apresentava como o melhor possível.

Como implementar um jornal cidadao, que renuncie de vender o seu poder de influência, em troques do apoio cidadao?. Eis umha proposta:

Financiaçom

Principalmente polas quotas periódicas dum grupo, grande o suficiente, de pequenos sócios patronizadores¹, estilo as rádios comunitárias dos USA, cientes que estám sustendo um projecto, i.e. que nom som simples assinantes dumha empresa jornalística. Cientes também de que o seu contributo vai ser aproveitado por outros, que sem pôr um cêntimo vam poder desfrutar do jornal. Contodo estes sócios devem ter algumha vantagem a respeito dos simples leitores.
Nom há porque renunciar aos ingressos publicitários, mas acho pouco realista pensar que vam representar umha percentagem importante dos ingressos.
Algumhas organizações poderiam apoiar o projecto, com dinheiros ou cedendo material e/ou pessoal. Penso por exemplo nos sindicatos, que som vilipendiados com freqüência nos media comerciais, e com os que se poderia negociar acordos de colaboraçom².
Sem renunciar aos subsídios públicos, estes devem ser sempre usados para um fim específico, de maneira que a sua ausência nom comprometa a viabilidade do projecto.

Elaboraçom

Um pequeno grupo de profissionais remunerados, jornalistas e informáticos principalmente, seriam os responsáveis do mantimento do projecto: ediçom, elaboraçom de notícias, maquetaçom, etc. Cumpriria-lhes também a coordenaçom de
Um grupo alargado de colaboradores voluntários, que podem contribuir tanto na elaboraçom de notícias, textos de opiniom ou de criaçom, humor, etc. Evidentemente os sócios podem ser colaborar no trabalho, e resulta lógico que os editores prestem mais atençom às suas colaborações do que a outros colaboradores nom sócios.

Seria bom também implicar na elaboraçom a organizações, sobre todo sectoriais, por exemplo grupos ecologistas, grupos de defesa da língua, grupos religiosos, grupos laicistas, etc. Umha noticia/opiniom nos seus blogues vai ter muita menos difusom que num jornal com um certo sucesso.

1Patronizadores, ou sócios, e nom accionistas, já que nom aspiram a que a empresa, e o seu investimento, produza benefícios.

2Poderia-lhes interessar pagar parte dos gastos, servidores por exemplo, e ceder algumhas horas de trabalho dos seus jornalistas e técnicos, em troca dum certo espaço no jornal, para novas ou opiniões fornecidas por eles. Os grandes sindicatos tenhem uns portais profissionais, mas suspeito que a sua audiência nom é muito elevada.

Reflexões ao fio do projecto Sermos Galiza - II

2011-07-13T22:00:00.000+02:00

Redefiniçom do campo de jogo

A rede tem alterado radicalmente o ecossistema jornalístico, trazendo umha forte competência para os jornais em papel, e como conseqüência as empresas jornalísticas tradicionais estám imersas numha forte crise.

O público afijo-se a nom pagar por ler os jornais na rede, impondo-se um modelo similar ao que vigora na rádio e na televisom, i.e. os médias na rede tem que viver da publicidade.
A rede nom conhece mais fronteiras que as lingüísticas, assim um galego, que nom se feche a dimensom internacional da sua língua, pode ler jornais dos 5 continentes sem se mover da sua casa.
O custo material de fazer um jornal em linha som menores que os dum jornal tradicional. Nom há gastos de impressom e os de distribuiçom som muito reduzidos, pois umha parte importante deles é paga polo leitor.
Na rede nom há apenas entraves para lançar um novo médio, como sim há para um jornal em papel, umha rádio ou umha televisom retransmitidas polas ondas. Isto facilita à cidadania poder publicar facilmente a sua opiniom, fazendo nalguns casos competência as empresas jornalísticas.
Como conseqüência dos três pontos anteriores há muita oferta, que deve ser pagada com publicidade, e a competência polos recursos escassos é feroz.
Por último, os jornais na rede competem com os jornais em papel, e mais, com freqüência um jornal em papel vê reduzida a sua difusom pola competência do mesmo jornal na rede.

Reflexões ao fio do projecto Sermos Galiza - I

2011-07-08T18:10:00.001+02:00

Quais som os produtos dum jornal?

Numha visom inocente as empresas jornalísticas produzem informaçom, e portanto para poder sobreviver precisam cobrar polo seu produto, bem directamente aos consumidores, bem indirectamente por meio da propaganda. Porém os média fornecem ao seu público algo mais que informaçom, fornecem-lhes os elementos fundamentais para organizarem a sua mundovisom, a maneira na que interpretam a realidade, i.e. fornecem-lhes ideologia e dirigem a sua olhada sublinhando uns assuntos e agachando outros.

Nas sociedades democráticas a capacidade dos média de influírem decisivamente nas opiniões públicas é poder. E na lógica capitalista este poder tem um valor económico, ou seja, é também um produto dos média. Assim som bem conhecidas as ajudas económicas, mediante subsídios ou propaganda desnecessária, que a imprensa galega recebe desde as distintas administrações: Junta, deputações, concelhos, para os seus governantes serem bem tratados polas empresas que recebem tais ajudas. Estas ajudas venhem-se outorgando às empresas jornalísticas ininterruptamente desde o princípio da democracia¹, algo do que nom usufruí nengum outro sector económico.

Mas nom som apenas as administrações públicas as que pagam polo poder dos média. Nom é raro os média silenciarem as protestas cidadás contra certas empresas. A maneira de pagar estes silêncios nom é usualmente tam clara como a das administrações públicas, mas é indubitável que o tais silêncios tenhem preço.

Nesta situaçom pretender ter umha empresa jornalística independente, crítica com os poderes públicos e económicos, que “venda” unicamente informaçom desaproveitando um dos seus produtos principais, a sua capacidade de influir na opiniom pública, que nom “venda” poder, é muito difícil roçando o impossível. Só se os ganhos obtidos da venda da informaçom for muito superior aos ganhos obtidos na venda do poder, seria isto possível.

1No regime anterior resultava inconcebível os média ousarem criticar os poderes públicos. Por outras palavras, as administrações públicas nom tinham necessidade de comprar os favores das empresas jornalísticas, pois tinham outros meios, muito efectivos, para assegurar-se um trato excelente.

A melhor maneira de defender o galego?

2009-07-17T20:45:00.003+02:00

Perguntam no Xornal qual é a melhor maneira de defender o galego. Eis a minha opiniom, longa de mais para a deixar numha caixa de comentários.

Rádios comunitárias em galego.

Quantas rádios emitem na Galiza em galego? quando menos maioritariamente. Onde eu moro nom há nengumha. Em teoria a Radio Galega emite integramente em galego, mas na realidade, isto dista muito de ser certo.

A maioria da música que emitem é cantada em castelhano, seguida em percentagem da música cantada em inglês. Cantigas em galego, da Galiza ou internacional, emitem umha percentagem mínima, ridícula, sobre todo para umha rádio cuja raison d'etre é promover a cultura galega.
Se bem os locutores falam galego, é muito habitual trazerem invitados que coitados deles, só sabem falar castelhano. Tenho comprovado pessoalmente que nom se preocupam o mais mínimo em procurar alguém que fale em galego. Se esta rádio fosse a única que houver na Galiza, seria bom que reflectira a diversidade lingüística do pais. Mas para escuitar falar castelhano, e para que a gente se poda exprimir em castelhano já estám o resto das emissoras. O difícil na Galiza é ouvir falar galego na rádio, nom ouvir falar castelhano.
Outra porta, bem larga, de entrada do castelhano na rádio galega, som as numerosas declarações dos mais diversos pessoeiros espanhóis. O locutor conta primeiramente, em galego, o que dixo o dito pessoeiro, para seguidamente reproduzir na integra as declarações. Algum dos dous sobra, ou o locutor ou o pessoeiro. Infelizmente está abertura lingüística só se dá com o castelhano, e nom com outras línguas.
Por último está o problema da qualidade do galego falado polos locutores, em muitos casos bastante castelhanizado. Cousa lógica quando se sabe que boa parte deles tenhem por língua usual o castelhano.

Infelizmente as outras emissoras que eu podo sintonizar de Santiago, emitem só alguns poucos programas em galego, e muitas vezes a contragosto, e nota-se.

O stablisment antigalego tem proibido eficazmente as rádios legais em galego. Como?, negando-lhe as licenças a empresas galegas e dando-lhas a empresas espanholas ou "galhegas". É possível que a intençom primária nom seja liquidar o galego, senom favorecer aos amigos, mas o efeito secundário é demolidor.

Se queremos rádios em galego, nom há pois mais remédio que fazer rádios alegais. Noutros países existe a possibilidade de montar rádios comunitárias. Mas no estado espanhol o poder desconfia, já vem de velho, do povo.

Montar rádios alegais tem o problema de que o poderes podem fechar as rádios quando quiger. Contodo há também muitas rádios alegais emitindo por Espanha adiante, e penso que no momento actual, tendo em conta os compromissos que tem assinado o estado espanhol de promoçom das línguas minoritária, nom seria muito provável que fossem a fechar as rádios comunitárias em galego.

Azzurro

2009-03-10T20:28:00.009+01:00

Há uns dias que me ronda pola cabeça umha cançom de Adriano Celentano, Azzurro. Assim que como terapia puxem-me a traduzi-la, e aproveito esta minha versom para reviver um pouco este meu blogue.
Azzurro Cerco l'estate tutto l'anno e all'improvviso eccola qua. Lei è partita per le spiagge e sono solo quassù in città, sento fischiare sopra i tetti un aeroplano che se ne va.	Azul Busco o verám todo o ano E de improviso ei-lo aqui Ela partiu para a praia E estou só aqui na cidade Sinto zunir sobre os teitos Um aeroplano que marcha.
Azzurro, il pomeriggio è troppo azzurro e lungo per me. Mi accorgo di non avere più risorse, senza di te, e allora io quasi quasi prendo il treno e vengo, vengo da te, ma il treno dei desideri nei miei pensieri all'incontrario va.	Azul, a tarde é muito azul e longa pra mim. Decato-me que nom há mais recursos, sem ti, e entom eu quase quase pego o trem e vou, vou onda ti mas o convoio dos desejos nos meus pensamentos vai às avessas.
Sembra quand'ero all'oratorio, con tanto sole, tanti anni fa. Quelle domeniche da solo in un cortile, a passeggiar... ora mi annoio più di allora, neanche un prete per chiacchierar...	Semelha quando estava no oratório com tanto sol, tantos anos atrás aqueles domingos sozinho num pátio, a passear... agora enfastio-me mais que entom, nem mesmo um padre para conversar...
Azzurro, il pomeriggio è troppo azzurro e lungo per me. Mi accorgo di non avere più risorse, senza di te, e allora io quasi quasi prendo il treno e vengo, vengo da te, ma il treno dei desideri nei miei pensieri all'incontrario va.	Azul, a tarde é muito azul e longa pra mim. Decato-me que nom há mais recursos, sem ti, e entom eu quase quase pego o trem e vou, vou onda ti mas o convoio dos desejos nos meus pensamentos vai às avessas.
Cerco un pò d'Africa in giardino, tra l'oleandro e il baobab, come facevo da bambino, ma qui c'è gente, non si può più, stanno innaffiando le tue rose, non c'è il leone, chissà dov'è...	Procuro um pouco de África no jardim, entre o loendro e o baobab como fazia quando rapaz mas aqui há gente, nom se pode mais, estám regando as tuas rosas, nom existe leões, quem sabe onde estám...
Azzurro, il pomeriggio è troppo azzurro e lungo per me. Mi accorgo di non avere più risorse, senza di te, e allora io quasi quasi prendo il treno e vengo, vengo da te, ma il treno dei desideri nei miei pensieri all'incontrario va.	Azul, a tarde é muito azul e longa pra mim. Decato-me que nom há mais recursos, sem ti, e entom eu quase quase pego o trem e vou, vou onda ti mas o convoio dos desejos nos meus pensamentos vai às avessas.

Gostaria de ouvir falar aos ossetas!!

2008-08-13T13:29:00.004+02:00

No actual conflito em Ossétia um farta-se de escuitar ao presidente da Geórgia, pode mesmo escuitar aos dirigentes russos, ainda que menos, mas os ossetas, que som as vítimas, se quadra nom as únicas, esses permanecem sem voz.

Cepticismo popular

2008-08-01T14:55:00.002+02:00

Vierom mouros filisteus
e dérom-nos bem de paus
que os bons só ajuda Deus
se eles forem mais que os maus

Sobre o nacionalismo

2008-03-18T16:56:00.004+01:00

US AND THEM. The Enduring Power of Ethnic Nationalism
By Jerry Z. Muller

... the central tenets of ethnonationalist belief are that nations exist, that each nation ought to have its own state, and that each state should be made up of the members of a single nation.

Por isso é tam comun nos estados multinacionais o poder central, nas maos da naçom mais forte, procurar diluir as nações menores.

Nos últimos tempos, em que o nacionalismo nom está na moda entre intelectuais, a estratégia do nacionalismo central é disfarçar-se de cosmopolitismo, mas sem deixar de agir como verdadeiro nacionalismo procurando socavar os alicerces das nações menores. Falando de respeito entre as diversas culturas, mas sem respeitar as que têm mais a mao.

Leituras de verao - IV

2008-01-02T18:45:00.000+01:00

Umha mulher rebelde¹

Comprei este livro sem muito entusiasmo, se quadra por tê-lo feito num hipermercado, se quadra polo título --gosto muito mais do título da versom em inglês: Infidel--, em todo caso temendo fosse este um lançamento oportunista que aproveitasse a fama da autora para vender um livro talvez polémico, mas sem substância "literária". Tinha contodo uns quantos dias livres por diante, apetecia-me ler, e nom tinha tempo para ir a umha livraria.

Tivem sorte, os meus receios foram infundados, e o livro cativou-me rapidamente e li-no em 3 dias, e isso compatibilizando-o com outras "obrigas" no jardim e na cozinha. Um auténtico "page-turner".

Esta obra é a autobiografia dumha mulher corajosa, apaixonada e inteligente. Pode paracer pretensioso escrever umha autobiografia aos 37 anos, mas a sua vida intensa, vivida em 6 paises e 5 línguas, e sob ameaça de morte, justifica plenamente a escrita.

Das minhas leituras de verao, este é o livro que mais vivamente recomendo. A história é apaixonante e educativa. Que mais se pode pedir.

¹ Ayaan Hirsi Ali, Uma mulher rebelde, ed. Presença, Lisboa, 2007

Leituras de verao - III

2007-09-11T13:32:00.000+02:00

O pecado de DARWIN¹

O génio intelectual adoita ir contrabalanceado com outras características da personalidade que nom fam excessivamente agradável a convivência. Pense-se na infantilidade de Mozart, ou no mau feitio de Beethoven. E o génio científico nom é umha excepçom; Newton era rancoroso e vingativo, Erdös muito excêntrico, Heaviside cruel, Einstein, pacifista e de grande honradez intelectual, foi infiel as suas duas mulheres, tratando nom muito bem a primeira, e prestando muito pouca atençom aos filhos.

Mas Darwin foi um pai e esposo devotado, e umha pessoa humilde e bondosa, que apesar dumha saude muito delicada, levou a cabo um trabalho de investigaçom hercúleo que revolucionou a biologia.

Bom demais, deveu pensar John Darnton. Assim que escreveu umha estória alternativa sobre a vida de Darwin e a origem da teoria da evoluçom por selecçom natural, onde deita umhas quantas sombras sobre a figura do sr. Darwin. O romance, em forma de pesquisa histórico-policial, lê-se bem quase até o final, onde se desincha um tanto.

É umha leitura agradável, que recomendo seja completada por algumha biografia real. Umha boa escolha que está a disposiçom do leitor lusófono é a de White & Gribbin², publicada nom há muito pola Europa-America.

O sinto sr. Darnton, mas Charles Darwin segue a ser um dos meu heróis.

¹John Darnton, O pecado de Darwin, ed. casadasletras, 2007.
²Michael White e John Gribbin, Darwin, ed. Europa-América, 2004.

Leituras de verao - II

2007-09-06T13:09:00.000+02:00

Einstein Defiant. Genius versus Genius in the Quantum Revolution¹

É esta umha crónica dum dos eventos mais importantes da física moderna: a revoluçom quântica. Crónica magistralmente complementada com umha descriçom impressionista, pinceladas esparsas mas reveladoras, da história política e social na que se inscreve a história científica. Consegue o autor nesta obra algo nom sempre fácil, escrever um relato de inegável qualidade literária, com umha prosa elegante, fluida e empolgante; e assemade educativo: informando ao leitor com umha linguagem bastante acessível, dos conceitos físicos que discutem os protagonistas do processo revolucionário. O qual nom é sem mérito, já que muitos deles som conceitos realmente estranhos para a mente humana.

Os protagonistas principais da história som Einstein e Bohr, mas logicamente nom se esquece de secundários importantes como Born, De Broglie, Dirac, Ehrenfest, Heisenberg, Planck, ou Schrödinger.

Sendo este um livro recomendável para qualquer um com umha certa cultura científica, resulta especialmente recomendável para os estudantes universitários que tenham que lidar, com umha certa profundidade, com os mistérios da teoria quântica.

¹ Edmund Blair Bolles, Einstein Defiant. Genius versus Genius in the Quantum Revolution, ed. Joseph Henry Press, Washington (USA), 2004.

Leituras de verao - I

2007-09-03T11:56:00.000+02:00

RELIGIÃO: TUDO O QUE É PRECISO SABER¹

Na capa da ediçom portuguesa aparece acompanhando ao título a frase que se supom resume o livro:

A evolução da Religião explicada por um dos maiores especialistas em História das Religiões.

Foi esta frase que me fez comprar o livro, mas após a sua leitura acho que um resumo melhor seria:

Do que se sabe, nom fala. Do que fala, nom se sabe.

Explico-me; o capítulo 2, dedicado a pré-história, tem 88 páginas, a pesar de que deste período nom haja vestígios escritos e muito poucos arqueológicos que permitam reconstruir os pensamentos religiosos da época. Porém ao cristianismo dedica 3'5 páginas e ao islám 2'5 páginas. Ignorando logicamente as multiplas seitas e variantes cristás e muçulmanas.

Umha vez superado o capítulo 2, onde o autor realiza árduos esforços por imaginar as religiões paleolíticas e neolíticas, a partir de dados muito escassos, num exercício dispensável de ficçom-histórica, o livro tem o seu interesse, oferecendo umha vissom global dos fenómenos religiosos na Eurásia. Contodo o pouco espaço dedicado aos monoteísmos faz que o subtítulo seja muito exagerado.

¹ Karl-Heinz Ohlig, Religião: Tudo o que é preciso saber, ed. casadasletras 2007.

Plantas invasoras

2007-08-21T20:59:00.000+02:00

Navegando à toa por internet fum dar com um site bem interessante:

Plantas invasoras em Portugal.

Muito bem documentado, com boas fotografias e um texto acessível. Das espécies listadas como invasoras, a maior parte também invadem a Galiza, servindo portanto o dito site também para a nossa terra.

Umha cousa que me chamou muitíssimo a atençom, é nom listarem nengumha das espécies do genero Eucalyptus como umha pranta invasora em Portugal. Se calhar o Eucalyptus globulus nom é legalmente umha planta invasora, a pesar de inçar polo norte de Portugal tanto como na Galiza. Mas a secçom: Impactos das espécies vegetais invasoras, semelha estar escrito pensando nele.

A única igreja verdadeira

2007-07-13T19:51:00.000+02:00

Reafirma-se a Igreja Católica como a única verdadeira. E faz bem. A Igreja Católica Romana é a única igreja verdadeira. Mas para sermos honestos também há que dizer que a Igreja das Testemunhas de Jeová é também a única igreja verdadeira, e que a Igreja Católica Apostólica Ortodoxa é também a única igreja verdadeira, e que a Igreja Adventista do Sétimo Dia é também a única igreja verdadeira, e que um longuíssimo etc de igrejas cristás, e outro ainda mais longo etc de igrejas nom cristiás som todas elas a única igreja verdadeira.

Compreendo que haja pessoas que considerem impossível haver mais de umha única igreja verdadeira, mas o que pode parecer ilógico para a fraca e falível mente humana, e porém lógico e verdadeiro para a mente divina, omnisciente e infinita. Como bem explicam as igrejas cristás, ou polo menos a maioria, Deus é um só mas composto de 3 pessoas, nom sendo cada umha dessas pessoas umha parte de Deus, senom Deus propriamente dito. Resumindo Deus é um e trino simultanemente. É só a finitude da compreensom humana o que explica a dificultade que temos para entender o chamado mistério de Santisima Trindade.

Da mesma maneira, no entanto a lógica humana rejeita a possibilidade de haver múltiplas única igreja verdadeira, na lógica divina nada há impossível.

Admirável home novo

2007-05-07T11:53:00.000+02:00

Sarkozy é um home admirável. Após nem sei quantos anos de ministro foi quem de apresentar-se como um renovador e ganhar. Em duas palavras "im prezionante".

Qual é o pensamento de Sarkozy, qual vai ser a sua política?, qui sait?. Diante dum público diz umhas cousas, diante doutro outras. Nisso nom se diferença de muitos outros político, mas ele sabe como conquistar a gente, modula a sua voz como os melhores actores, e sabe fugir dos seus pontos fracos, escolhendo o discurso que mais lhe beneficia.

É um autêntico sedutor. Nisso lembra-me muito a: Chirac. Ou seja umha mudança espectacular.

Versom em árabe d'El Mundo

2007-04-12T09:33:00.000+02:00

Contam os media que o terrorismo islamista voltou atacar con força na Argélia, e tentou fazê-lo também no Marrocos. Pergunto-me se os bons muçulmanos vítimas nun destes atentados têm ou nom direito a virgens no paraiso?, quantas?.

Contodo o que mais me preocupa é as autoridades magrebinas ignorarem que trás todos estes morticínios está a mao da ETA, conluiados como é bem sabido com as hostes polanco-socialistas. Para quando umha versom d'El Mundo em árabe?!.

Antiamericanismo

2007-01-12T19:36:00.000+01:00

Se eu fosse anti-americano estaria deliciado com o actual presidente do EUA. Nos seus dous mandatos está a conseguir:

diminuir a influença do seu pais em todo o planeta,
afundir a sua economia,
embarulhar a sua burocracia,
danar significativamente a ciencia norteamericana

Agora quer enviar mais tropas ao Iraque, entanto procura novos enemigos na Siria e no Iram, afundando a divisom no seu pais e sobrecarregando o seu exército. Que mais se pode pedir!. Desde logo é dificil fazer mais em menos tempo.

Erros e acertos

2007-01-11T10:02:00.000+01:00

No ano 2000, aquando das eleições presidenciais dos EUA, em conversa fiada afirmei que preferia ganhar Bush, já que pouca diferença ia haver entre el e Al Gore, mas com o republicano íamos ter mais diversom.

Tenho que confessar que fiz um enorme erro de julgamento, e umha terrível injustiça para com Al Gore. Homem ao que hoje em dia valor muito mais do que entom, e nom só em comparança com o actual presidente dos EUA. Mas também posso dizer, com um ponto de orgulho, que nom me enganei na capacidade do sr. Bush junior em dar espectáculo e afastar o tédio das nossas vidas. Com ele cumpriu-se a a maldiçom chinesa: vivemos uns tempos interessantes.

O olho da Pescanova

2007-01-09T14:01:00.000+01:00

Pescanova tivo que abandonar um projecto para a construçom dumha granja de rodovalho na Galiza, no cabo Tourinham, por escolher como local um sítio parte da Rede Natura 2000 da UE. Amuados por o governo galaico querer fazer cumprir as leis, que cousas têm alguns governos, anunciou retumbante que levaria a cabo o projecto noutras terras, e que a Galiza ficaria sem a choruda inversom. E marchárom a Portugal, mas com tam bom olho que escolhêrom como localizaçom para a nova granja outra parte da Rede Natura. Porém seica as leis portuguesas som mais elásticas do que as galegas, ou o governo português é mais incumpridor das suas leis, assi que por agora seguem adiante com o seu projecto.

Transporte público

2007-01-08T14:28:00.000+01:00

Há uns dias tivem que viajar em bus. Quase duas horas aturando umha mistura infernal de rap, reggaeton e demais merdas. Que tortura!.

Reconheço que o uso do transporte público é energeticamente mais eficiente, e portanto ecológico. Mas entanto os motoristas teimem em castigar-me com ruído musical, ou com doses brutais da Cope* seguirei fugindo dos ónibuses como da peste.

* Cope = cadeia de rádio espanhola propriedade dos Bispos espanhóis.

Galego tropical - II

2006-12-09T19:29:00.000+01:00

Escuitei a Maria Bethânia por primeira vez no Olimpia, em Paris. Nom sabíamos nada dela, vimos uns cartazes dela e decidimos ir. Essas arroutadas saem bem às vezes, e esta foi umha delas.

Nunca ouvíramos cantar em galego tropical, e tivemos a sorte de ir dar com umha das melhores vozes do Brasil, e portanto com umha das melhores vozes do mundo.

Hoje, graças ao youtube podo lembrar aquela noite em Paris. Estou a me fazer velho, caralho!.

Prós e Contras

2006-11-30T16:32:00.000+01:00

Assistim ontem a um debate na RTPi sobre as universidades portuguesas. Para um espanhol resulta inacreditável: um ministro debatendo à serio com os reitores na TV, opiniões encontradas, mas intervenções respeitosas.

O único mau foi a apresentadora, como sempre a interromper sem jeito.

Mais informaçom no abrupto.

Galego tropical - I

2006-11-03T13:27:00.000+01:00

Quando eu era um cativo gostava muito do cantor brasileiro Roberto Carlos. Infelizmente eu só podia escuitar as suas versões em castelhano. Só anos mais tarde, já bem deles, e graças a internet pudem escuitá-lo cantando as versões originais em galego tropical[1]. Vendo quas som as suas canções que mais aparecem na rede, e se a minha memória nom me falha, dá-me a impressom que os seu sucessos em português nem sempre fôrom êxitos na Espanha, e vice-versa, nem sempre os seus sucessos na Espanha o foram no Brasil. Como mostra eis umha cançom que foi novidade total para mim:

[1] Os/as leitores/as nom galegos podem surpreender-se com isto de chamar galego tropical ao português do Brasil. É umha piada galega, mas que tem o seu aquele, como pode ler-se no artigo O Brasil fala a língua galega, do professor brasileiro Júlio César Barreto Rocha.

Esperando ordes de Roma.

2006-10-18T18:09:00.000+02:00

No Guardian do 18 de Outubro Simon Jenkins publica um esclarecedor artigo de como os EUA estám a deixar ao Reino Unido com o cu pró ar em relaçom a guerra de Iraq. Paga a pena ler o artigo na sua totalidade, mas eu gostei tanto dumha frase que resume a situaçom, que abandono o meu siléncio, e a traduzo para este meu blogue:

Downing Street esta paralisado intelectualmente, como um posto militar remoto e esquecido dum Imperio Romano a se desmoronar. Pode ver os barbaros às suas portas, mas nom responde como sabe que debera porque nom dam chegado novas ordes de Roma.

Se cadra é que ando um tanto romanizado, já que ultimamente lim um par de libros sobre a queda do império romano dos que gostei, e que aproveito para recomendar:

Peter Heather, The Fall of the Roman Empire : A New History of Rome and the Barbarians.
Bryan Ward-Perkins, Queda de Roma e o Fim da Civilização.

Agora que o penso, ambos autores son britânicos, e os livros recentes. Se quadra o sr. Jenkins também os leu, e dai a sua metáfora romana.

Responsabilidades

2006-09-14T19:46:00.000+02:00

Leio no Galicia Hoxe que a secretária geral de política lingüística, falando da saúde da nossa língua, anima a "ver o vaso medio cheo", entanto o presidente da Real Academia Galega ao falar do porquê a nossa língua tem um uso minoritário nos media di que "non se pode pedir responsabilidades nin a Academia nin ó goberno galego sobre campos onde non pode actuar".

Sinto-o muito mas é-me mui díficil ver o copo meio cheio quando o actual governo da Xunta, seguindo os passos do anterior, acaba de outorgar licenças de radios e Tv majoritariamente a empresas nom galegas, e em todo caso sem tentar no mais mínimo inverter a actual situaçom de maioria esmagante do castelhano nos media que emitem na Galiza, que nom galegos. Quando actualmente o galego apenas tem presença nas radios e Tv analógicas que se emitem na Galiza, e qaundo isso mesmo vai a seguir a ocorrer nos media digitais, como se pode ser medianamente optimista?

Cumpre salientar que qualquer um, empresa, associaçom ou particular, nom pode emitir livremente sinais de radio o tv. Para poder emitir cumpre ter umha licença, bem autonómica bem estatal. Se as licenças som outorgadas à empresas que emitem em castelhano e se lhes negam às que o fariam em galego, qual vai ser o futuro do galego?

Quanto a responsabilidade da Academia é também grande. Ao escolher um caminho divergente do português, ao afastar o modelo culto do galego da língua portuguesa, como se está fora o demo, fanam a melhor oportunidade de pervivencia da nossa língua, possivelmente a única na situaçom actual, i.e. numha Galiza dependente dentro do espanhol.

Escolher um modelo de língua pequena, independente do português que nom do castelhano, pode-lhes parecer aos senhores da RAG o caminho mais seguro. A mim também me parece um caminho seguro, que com toda seguridade leva à sua extinçom.

Montes queimados

2006-08-27T20:23:00.000+02:00

Agosto de fume e lume
paradiso de incendiários
enchendo telediários
queimando do val ao cume.

Vento fusquenlho de fogo
outrora mountes dourados
tornaste montes queimados
no teu tolo e triste jogo.

Um grande dia

2006-06-30T16:07:00.000+02:00

Ontem foi um grande dia:

O primeiro ministros espanhol, o sr. Zapatero, anunciou o inicio das negociações do seu governo com a ETA, que esperemos levem a umha paz definitiva em Euscadi.

Será capaz o PP de viver sem o seu brinquedo favorito?

O tribunal Supremo dos EUA, mesmo com maioria republicana, declara ilegais os tribunais especiais de Guantánamo. Coutando assi a deriva totalitária do actual governo norteamericano. Ou polo menos isso espero eu.

Claro que um home que fala com Deus, pode muito bem considerar que os tribunais nom têm nada que opinar sobre o assunto.

A força da fé

2006-05-22T13:46:00.000+02:00

Quando sendo um cativo lim na Bíblia que o Espirito Santo outorgara a alguns dos primeiros cristaos o dom de línguas imaginei, se quadra erroneamente, que os atingidos pola graça divina passaram a se poder exprimir em línguas diferentes das suas e faladas por outros povos.

Na televisom Manasat o apostolo Jorge Tadeu mostra na prática outra interpretaçom possível. Assi acotio, no meio das suas charlas religiosas, anuncia aos seus fiéis, e aos que o seguem por TV, que vai falar em línguas, e em seguida pom-se a recitar umha algaravia sem senso, que me lembra os meus anos infantis quando jogava com as minhas irmás a cantar em estrangeiro[1]. Mas nom contento com o seu recital babélico anima seguidamente aos seus fiéis ao imitar, cousa que fazem coa mesma falta de senso e de vergonha.

Num princípio rim-me chocado, mas logo compreendim que com isso estava a demonstrar a força que lhe outorga a sua fé. Pois realmente cumpre ter muita força de espirito para prestar-se ao ridículo dumha maneira tam espantosa diante dumha audiência televisiva, que sem muito esforço pode imortalizar as suas actuações.

[1] As nossas canções podem se considerar umhas precursoras do hit estival Aserejé, sem o seu ritmo pegadiço mas com umha mensagem similar. Os discursos do apóstolo televisivo lembram mais as nossas balbuciadelas infantis que o sucesso de Las Ketchup.

Montes dourados

2006-04-27T09:49:00.000+02:00

Na primavera tojos e gestas recobrem de ouro os montes galegos, fazendo-nos esquecer por um tempo da desfeita que os neobárbaros estám a completar na nossa terra.

Tempora mutantur II

2006-04-20T09:50:00.000+02:00

Acabo de ver um par de obreiros com um fato macaco (mono em castelhano) de cor rosa. Já e a segunda vez que os vim, a primeira achei ser umha miragem, mas agora estou seguro nom ter sonhado.

Muito mudárom as modas masculinas nestes últimos anos. Há só 30 anos nengumha empresa da construçom pensaria em ter uns fatos macacos rosas para os seus empregados, e se algum directivo ousa-se tamanha heresia a rebeliom das massas operarias fanaria rapidamente a inovaçom de vestiário.

Tempora mutantur

2006-02-21T18:48:00.000+01:00

A rebufo da polémica sobre as caricaturas de Maomé o Papa Bento XVI declarou ser

necessário e urgente que as religiões e os seus símbolos sejam respeitados e que os crentes não sejam alvo de provocações que firam a sua iniciativa e os seus sentimentos religiosos.

Isto lembrou-me um meu professor de religiom, sacerdote católico com algum carrego na catedral de Lugo. Voz portanto autorizada, se bem nom tanto como o Papa. Nalgum momento falou-nos do Islám, que sendo fundada por um tolo com alucinações, i.e. Maomé, nom podia senom ser opus diaboli (obra do demo).

As duas terras

2006-02-20T18:15:00.000+01:00

Em tempos conturbados e conturbantes como estes, onde umhas caricaturas incendeiam meio planeta, entanto na Península Ibérica assustimos a um revival nacional catolicista, vêm-se-me a cabeça as palavras de Abu-Ala al-Maari, escritor sírio do século XI:

Os habitantes da Terra dividem-se ao meio:
os que têm um cérebro mas nengumha religiom,
e os que têm umha religiom, mas nengum cérebro.

(Re)vestindo poemas II

2006-01-29T13:31:00.000+01:00

Há uns dias um amigo, contumaz leitor de poesia, dixo-me que ficará deslumbrado polo seu último descobrimento: Dario Xoan Cabana. A mim, que gosto de poucos poetas, resultou-me estranho que alguém, que já nom é um rapaz, pudera descobrir agora ao sr. Cabana. Autor que conheço[1] e apreço desde A Fraga Amuralhada, editada no já longuíquo 1983. Cousas da vida.

Sendo como é persoeiro da FPG, asocio a sr. Cabana com o isolacionismo, e se quadra parece-lhe mal o meu atrevimento de vestir os seus versos com umha grafia distinta da sua original. Mas espero que, caso chegue a saber desta ousadia, veja nela o que é, um tributo ao seu talento.

Fraga no coraçom, nossa morada,
pedra velha luída polo fume,
coutamento que bravo e fero lume
converte em mansa a cousa dominada.

Fraga no coraçom e levantada
que de todo o que somos é resume,
lentor de velho e cálido costume,
alegria de cousa inesperada.

Fraga que dentro nossa amuralhamos
c'o nosso coraçom arrodeada,
casa própria que amamos e habitamos
considerando o decorrer da vida,
considerando a pedra cinzelada,
considerando a morte pressentida.

Dario Xoán Cabana

[1] Conhecimento literário, nom pessoal.

Cidade de Deus - Filme do Demo

2005-12-20T18:59:00.000+01:00

Anunciavam os passado dia 30 de Novembro no PGL um ciclo de cinema em português na Universidade de Vigo. Abrindo o ciclo, ainda nom rematado, estava o filme de Fernando Meirelles Cidade de Deus. Eu vim o filme em Lisboa, gostei dele apesar de quase nom perceber os diálogos, percebim a voz do narrador (voz em off), mas quando falavam as personagens na favela (a maior parte da fita sonora) percebim exactamente 3 palavras: caralho, moleque e molecada. Se bem tais palavras repetiam-se abundantemente durante o filme. Graças a internet sei que nom fum o único em ter dificultades.

Nunca estive no Brasil, mas tenho visto outros filmes brasileiros, e desde há um par de meses recebo via satélite um par de canais de televisom brasileiras. Ouvindo a televisom, esses outros filmes, diria que no Brasil falam galego tropical. Ouvindo Cidade de Deus, poria em dúvida que falassem algumha língua indoeuropeia. Suponho que o filme reflecte fielmente a fala das favelas cariocas, mas esta dista muito do brasileiro padrom.

Suponho que os redactores do PGL incluem a notícia do ciclo, encabeçando-a com um cartaz do dito filme, pensando em que a divulgaçom de recursos lusófonos na Galiza é boa sempre. Mas na minha opiniom isto nom é sempre certo. Alguém que entre em contacto por primeira vez com o português do Brasil graças a este filme, mesmo com umha boa apresentaçom da realidade lingüística do pais, facilmente pode tirar umhas conclusões erradas sobre os falares brasileiros, nada favorecedoras às teses reintegracionistas.

Saiu-me a mensagem um tanto negativa, mas apesar de ter gostado do filme, seria o último filme que eu utilizaria para fazer propaganda reintegracionista.

A queda do impêrio romano

2005-12-16T19:45:00.000+01:00

Esta semana, às terças, começárom a emitir na televisom espanhola Cuatro umha série de televisom de BBC/HBO intitulada ROMA. O seu primeiro episódio foi magnífico, quando menos do ponto de vista da reconstruçom do ambiente.

Comentado sobre esta série com uns amigos saiu como nom o tema da decadência do Império Romano. Esta é umha das inverdades com mais sucesso da história ocidental, a que liga da decadência do Império Romano com os costumes dissolutos e o deboche dumha sociedade exemplificada nos excessos dos imperadores Julio-Claudianos (Tibério, Calígula, Cláudio e Nero).

É certo que a sociedade romana nos seus principados tinha uns valores morais que podem resultar decadentes para alguns: as práticas homossexuais eram bastante gerais, a pornografia era muito comum (como se pode ver na ruinas de Pompeia), o infanticídio era umha prática corriqueira... Mas também é inegável que esta época se corresponde ao início do império, século I, e nom a sua decadência, século V.

Alias pode-se afirmar rotundamente que a decadência do Império Romano dá-se quando este é já um estado cristao, a partir do principado de Teodósio I (379–395). Portanto se há algumha relaçom entre a queda do Império Romano e costumes morais e religiosos, deveria chamar-se decadentes os costumes e moral cristaos, e nom os pagaos.

Levantamento de sotainas

2005-11-29T18:58:00.000+01:00

No último documento do Vaticano afirma-se que: nom pode aceitar na ordem sagrada pessoas que pratiquem a homossexualidade, que tenham profundas tendências homossexuais, ou que apóiem a cultura gay.

Quer-se isto dizer que podem aceitar na ordem sagrada, vulgo fazer curas, aos homes que pratiquem a heterossexualidade??. Deixa de ser obrigatório o celibato?.

Turismo da folha

2005-11-23T15:49:00.000+01:00

No noreste dos EUA o outono tinge as paisagens com inumeras cores onde sobranceam o vermelho e o marelo. As paisagens som tam espectaculares que dérom lugar ao chamado turismo da folha (leaf tourist, ou fall foliage travel); gente (leaf peepers) que vai doutras partes dos EUA a gozar a grande variedade cromática das florestas e barrios residenciais.

Na Galiza atlántica cumpre ir às cidades para poder ver um pouco de colorido nos parques. Fora deles o verde monótono de pinheiros e eucaliptos monopoliza a paisagem. Mas como a inércia galega enorme, a gente e os media aindam seguem a falar das bonitas paisagens galegas.

Advertências nas etiquetas

2005-11-22T16:04:00.000+01:00

Vendo as rapazas mostrar o umbigo em pleno Novembro, e imaginando os problemas de lumbago que isso vai provocar tarde ou cedo, ocorre-se-me que da mesma maneira que os pacotes de tabaco advirtem dos perigos de fumar, as prendas de roupas deveriam alertar dos perigos que supóm para a saude:

O uso destas calças pode dar lugar a moléstias crónicas na regiom lombar.
Estes sapatos podem induzir problemas de coluna.
O uso destas botas no verao dá lugar a cozimento de pés.
etc.

Estudo de religiom

2005-11-22T10:02:00.000+01:00

A 30 anos da morte de Franco o Estado Espanhol segue as ser um estado religioso, nom na sua constituiçom, tantas vezes invocada quanto incumprida, mas si na sua legislaçom e na realidade quotidiana.Quantos anos terám que passar-se ate termos um verdadeiro estado laico e aconfesional? Quantos anos até que nas escolas espanholas se ensine, nom religiom, única e indiscutível, senom religiões, múltiplas e várias?.

Quando digo ensino das religiões, nom digo que os filhos dos católicos sejam adoutrinados no catolicismo, nem os dos luteranos no luteranismo ou ou budistas no budismo. Senom que todo o alumnado tenha aceso a diversidade religiosa da humanidade. O ideal seria que um sunita explique o Islám sunita, outro xiita o xiismo, um ortodoxo o cristianismo ortodoxo, um induista o induismo, etc. Ma se só se pode contar com uns poucos professores, tentem eles serem neutros e nom apologéticos dumha determinada.

O adoutrinamento deveria ser feito fora da escola, nas igrejas correspondentes ou na família. Isto seria realmente liberdade religiosa, e nom às rodas de moinhos com as que nos querem fazer comungar os privilegiados bispos católicos.

Que inventem ELES

2005-11-21T16:21:00.000+01:00

Queixava-se o outro dia Marina Mayoral numha coluna de La Voz de Galicia das torturas que tinham que aturar as mulheres ao lhes fazer umha mamografia. Para seguidamente acusar aos homens por idearem o método e aparelhagem responsáveis dos sofrimentos femininos, e por nom terem interesse em melhorá-los ao nom serem eles sofredores.

Que há sádicos nom se pode negar. Mas a imensa maioria dos homens nom gosta de maltratar mulheres desconhecidas, e menos nessa parte da sua anatomia. Por outro lado hoje em dia boa parte, provavelmente a maioria, do pessoal sanitário que realiza as mamografias, i.e. o responsável directo do mau trato, som mulheres.

Em todo caso acho a queixa extemporânea. Tal queixa teria a sua razom de ser há um século, quando a sociedade limitava severamente a educaçom e posterior carreira profissional das mulheres. Mas há já muitos anos que as mulheres acedem à educaçom superior, de facto no Estado Espanhol há quando menos duas gerações que as mulheres entrárom maciçamente na universidade, e como é bem sabido nom foi precisamente na Península Ibérica pioneira neste processo. Há hoje em dia portanto medicas, enfermeiras e engenheiras sobejas para melhorarem os aparelhos e técnicas mamográficas sem lhes pedir permissom ou opiniom a homem nengum.

Por que nom o fazem?, se quadra porque nom lhes parece um problema muito importante, ou talvez porque nom é fácil solucioná-lo.

Nom todos os problemas têm fácil soluçom, e cumpre aturar a soluçom menos má. Ou alguém pensa que os homens com problemas de próstata usam as sondas, esses aparelhos tam cómodos e gostosos, por o género masculino nom lhe dar importância.

Respeito as iniciativas cívicas

2005-11-09T14:01:00.000+01:00

Fillos de Galicia é desde há anos um ponto de encontro virtual da diaspora galega. Nacida graças a vontade empreendedora dum galego-basco informático, Manu Casdeiro, e que se financia a base dos quotas dos seus sócios, tem conseguido achegar a Galiza e entre si a milhares de galegos de além e aquém mar.

Consta-me que a directiva desta associaçom tentou várias vezes obter respaldo institucional do governo autónomo galego, mas com resultados pouco positivos. De facto umha das cousas que conseguiu foi que pouco antes das últimas eleições autonomicas o dito governo, naquela altura do PP, tenta-se copiar o seu site, ainda que com uns resultados muito pobres.

Porque se a Conselharia de Emigraçom considerou útil um site como o de filhos nom falou com eles e os apoiou?. Nom pudo ser ignoráncia, com certeça sabiam do site de filhos, de facto copiarom-no. Conhecendo as artes do PP a razom semelha-me óbvia: fillos era umha associaçom independente que nom controlavam.

Desde aquela houvo eleiçõess e troco de governo. Mas o novo secretário geral de emigraçom, D. Manuel Luis Rodríguez, (PSOE), quer seguir os passos do seu predecessor; despreçar o ingente trabalho feito por umha iniciativa cívica e independente, e copiar o já feito. Porque?, quer também o PSOE controlar a sociedade galega, mesmo a diaspora, como a controlava o PP?, O cámbio era para isto?.

Esperemos que nom, que o novo governo seja quem a romper com velhas inércias, e confie e respeite a sociedade civil. Mas neste caso nom começarom com bom pé.

(Re)vestindo poemas - I

2005-11-07T20:26:00.001+01:00

           
         Se me vem a levar a morte amiga
     nom cantes meu amor, triste cantiga
      nem chantes a carom do meu sartego
                      o salgueiro chorom:
     que me cubra erva mol, erva molhada
   polas báguas da choiva e da orvalhada,
    e, se queres, relembra-me em sossego,
                        esquece-me senom.

Christina Rossetti escreveu os versos, em inglês
Ramom Cabanilhas traduziu-nos ao galego, pré-guerra
e eu adaptei a ortografia ao século XXI

Dies iræ

2005-11-02T17:47:00.000+01:00

E sempre os deuses como causas de todos os males D.A.F. Sade

Com motivo do furacam Katrina erguêrom-se vozes da direita religiosa americana apondo-lhe a catástrofe à ira divina. Ira originada pola falta de fé e vida pecadenta povo americano.

Porque um ser omnipotente, capaz de se inteirar do pensamento de todos os milhares de milhões de pessoas que habitam este planeta, que presta ajuda espiritual e mesmo material aos que nel tenhem fé, como pergunto-me eu, é que este ente todopoderoso nom é mais preciso quando manda as sua mensagens?. Porque, digo eu, nom destrui umha clínica abortista, ou um cento delas de vez?. Ou já postos porque Jeova foi escolher Nova Orleães em vez de Nova Iorque, a Babilonia dos nossos tempos, ou de San Francisco, Sodoma e Gomorra juntas?.

Pouco após do Katrina houvo um grande terramoto na Caxemira, e voltárom-se a escuitar vozes religiosas, desta vez integristas muçulmanas, reivindicando a catástrofe para Alá. Segundo às suas proclamas o castigo de Alá foi devido a motivos similares aos de Jeová. Mas a mim nom me quadram as contas.

Fai-se-me difícil crer que Alá castigará tam duramente aos habitantes da Caxemira, a imensa maioria deles muçulmanos, que cumprirám melhor ou pior com os preceitos alcoránicos, mas em todo caso muito melhor que a maioria dos norteamericanos.

Por outro lado estou bem certo que os habitantes da Luisiana e do Missisipi som em geral muito melhores cristaos que os paquistaneses. Que senso tem pois que Alá castigue na Caxemira e Jeová no sul dos EUA?

A lógica aponta pola contra noutra direcçom. Se Jeová castigou aos maus cristaos, castigou no Paquistam, e se Alá castigou aos maus muçulmanos, castigou nos USA.

Há algumhas almas cândidas que consideram que Alá e Jeová som o mesmo Deus, mesmo dizindo cousas muito diferentes. Mas nem os telepredicadores norteamericanos, nem os mulláhs paquistaneses acreditam em semelhantes abominações. Eles sabem com certeça qual é o seu Deus, o único verdadeiro, e quanto equivocados estám os outros.

Dado que o Tsunami prévio afectou a paises muçulmanos e pagaos (hinduístas, budistas, etc), e só algumhas pequenas comunidades cristás, é de suporque o autor fosse Jeová. E tendo em conta o terramoto de há um par de anos em Bam, a estas altura do partido Jeová vai ganhando por goleada.

Ainda que se quadra também haja que ter em conta ao Deus dos judeus (Yahve, deixando Jeová para os cristaos), e algum(s/as) Deus(es/as) indiano(s/as).

Rentável ou rendível?

2005-10-19T13:10:00.000+02:00

Rentável ou rendível?. Ambas formas som aceitadas polos dicionários portugueses, mas qual é a mais corriqueira?.

Tenho a impressom que nos textos galegos aparece com maior freqüência rendível, mas nos textos portugueses e brasileiros?.

Há uns anos contestar a esta pergunta desde a Galiza daria um certo trabalho. Mas hoje em dia podemos botar mao do google, e a resposta é rápida e concludente:

rentável aparece em 211.000 páginas

rendível aparece em 686 páginas

Os pingüins atacam de novo

2005-10-10T11:53:00.000+02:00

Quase todo o mundo conhece os prémios Nobel, que consagram a carreira dos mais distintos cientistas. Mas hoje em dia estes prémios estám um algo esclerotizados, sendo muito mais interessantes, se bem menos conhecidos, os prémios IG Nobel. Estes galardões instituirom-se para laurear à pesquisa improvável, às vezes, bastantes, tais pesquisas som ademais inúteis, mas nom sempre. Em todo caso os trabalhos premiados provocam sempre um sorriso.

Este ano entregarom-se os prémios IG Nobel o passado 6 de Outubro. Todos os trabalhos galardoados tenhem o seu mérito, mas eu gosto especialmente de dous:

O prémio de Literatura, outorgado a um grupo nom-identificado de "emprendedores" da internet nigerianos, por criarem e difundirem usando novas tecnologias (correio electrónico), un conjunto de contos comoventes, apresentando a milhões de leitores um rico grupo de personagens, como o general Sani Abacha e a sra. Mariam Saani Abacha, que pedem do internauta "uma pequena soma em dinheiro" para poderem obter uma fortuna à qual tenhem direito e que gostariam de dividir com o gentil internauta.

O prémio de Dinâmica de Fluidos, outorgado a Victor Benno Meyer-Rochow (das Universidades Internacional de Bremen -Alemanha- e Oulu, Finlândia) e Jozsef Gal (da Universidade of Loránd Eötvös, Hungary) polo seu autorizado trabalho "Pressões produzidas ao cagarem os pingüins --cálculos sobre a defecaçom aviária", onde se fai uma estimativa matemática precisa da pressão com a qual os pingüins antárcticos expelem as suas fezes. Em palavras dos conceituados científicos: "As forças envolvidas, muito além daquelas conhecidas para os seres humanos, são altas, mas sem produzirem um fluxo turbulento que desperdice energia".

Farinha triga

2005-09-25T22:20:00.000+02:00

Farinha triga. Quando eu era pequeno ainda se usava está expressom na casa dos meus avós. Os velhos entom tinham-lhe muito respeito ao pam, e mais se era pam-trigo, e fazia-no-lo bicar antes de o deitar ao lixo, daquela chamava-se-lhe lavaduras. E pra deitar o pam ao lixo havia que ter algumha boa razom.

Já choveu desde entom, e havia muito tempo que nom batia coa expressom fora dos livros. Até ontem.

Ontem fum coa mulher de excursom pola beira sul do rio Minho, e depois de visitar o feirom de Vila Nova de Cerveira, e comer arroz de marisco em Vila Praia de Âncora, entramos a fazer umhas compras num supermercado. Entre as cousa que queriamos comprar estava farinha, e foi ali -no supermercado os 3 mosqueteiros- onde, pola primeira vez na minha vida, vim escrito numha embalagem comercial a velha expressom da tribo: farinha triga.

Para roborar o achado compramos pam, de farinha triga por suposto, como bem testemunha a etiqueta.

Nom foi o remoinho de sensações que assaltou ao protagonista d'A procura do tempo perdido ao provar a mais famosa das madalenas. Mas à minha mente encheu-se também de lembranças, lembranças dos quentes dias de Julho na minha nenice, nos que ainda se ceifava o pam com foucinho e se malhava na eira.

Portugal, Portugal, esse esquisito pais onde a nossa língua reina nos supermercados.

O trilho reintegracionista

2005-09-22T22:55:00.000+02:00

Para explicar o porque os reintegracionistas nom queremos/podemos colaborar com o isolacionismo ("normativa oficial"), vou contar um caso que me passou quando era um rapazolo.

Já morrera Franco, nom havia muito tempo, e teria eu daquelas uns 13 ou 14 anos. Era Agosto, estava de ferias na marinha luguesa, e fora com uns amigos de excursom em bicicleta. Iamos por caminhos de terra, cousa corriqueira naqueles tempos, e por suposto sem iluminaçom pública. Na volta, já no solpor, chegamos a um ponto onde as opiniões do grupo sobre qual era o caminho a seguir divergiam. Alguns consideravam que havia que ir por um caminho, nom muito amplo mas caminho, eu achava que tinhamos que ir por um trilho estreito, entanto o resto nom tinha opiniom. Trás umha breve discussom todos, excepto eu, acordaram ir polo caminho. Como eu lembrava claramente por onde vinhamos dixem-lhes entom:

- Bem, vos ides por ai, e eu marcho por aco, e já nos veremos amaham.

Nom sei se foi por ver-me tam decidido, ou por nom deixar-me só, mas vinherom todos comigo polo trilho estreito. Como dixem era no lusco-fusco, estavamos no meio do mato, e nom havia um poste de luz a vários quilómetros, de maneira que escolher o caminho errado podia significar ter que andar várias horas a pé, coa bici na mao e às apalpadelas até achar umha estrada ou algo conhecido. Mas houvo sorte, e nom tardou muito em chegarmos a terreo conhecido por todos. Daquela um dos amigos perguntou-me:

- se nom chegamos a vir contigo, virias tu só?,

e eu contestei-lhe:

- claro, eu sabia o caminho, se nom fora tam tarde eu ia convosco, davamos um rodeio, mas suponho que acabariamos atopando o caminho de volta. Mas era muito tarde, estamos a ficar sem luz, e nom podia permitir-me o luxo de perder o tempo.

Visto da distância era um bocadinho temerário, mas tinha muito claro qual era o caminho certo.

No tema da língua passa-me algo semelhante, eu considero que o caminho isolacionista é errado, e leva-nos ao desaparecimento da língua galega. Se quadra estou equivocado, mas nom se me pida que contribua ao que eu considero é umha desfeita. Se a situaçom da língua nom fora tam premente, se quadra permitia-me o luxo de seguir a maioria até ela achar o caminho certo. Mas tampouco há muita luz para a língua galega, e neste caso prefiro andar em minoria polo caminho que considero certo, a ir com a maioria num caminho que considero errado, ainda que ir com a maioria seja sempre mais cómodo.